ಬಾಯಿ ದುರ್ವಾಸನೆ ಸಮಸ್ಯೆ ಇದ್ದರೆ, ಈ ಟಿಪ್ಸ್‌ನ್ನು ಒಮ್ಮೆ ಪ್ರಯತ್ನಿಸಿ ನೋಡಿ!

0
640

ಬಾಯಿಯ ದುರ್ವಾಸನೆಗೆ ಪ್ರಮುಖ ಕಾರಣ ಬಾಯಿಯ ಸ್ವಚ್ಛತೆಗೆ ಆದ್ಯತೆ ನೀಡದೇ ಇರುವುದು. ಹಲ್ಲುಗಳ ಸಂಧುಗಳಲ್ಲಿ ಆಹಾರಗಳ ಕಣಗಳು ಉಳಿದು ಬ್ಯಾಕ್ಟೀರಿಯಾಗಳಿಗೆ ಕೊಳೆಸಲು ಅವಕಾಶ ಸಿಗುತ್ತದೆ. ಉಸಿರಿನ ದುರ್ವಾಸನೆಗೆ ಉಳಿದ ಕಾರಣಗಳೂ ಇವೆ. ಮೂಗಿನ ನಾಳ, ಅನ್ನನಾಳ ಮತ್ತು ಹೊಟ್ಟೆಯಲ್ಲಿ ಏನಾದರೂ ತೊಂದರೆಯಾಗಿದ್ದರೆ ಇಲ್ಲಿಂದಲೂ ದುರ್ವಾಸನೆ ಸೂಸಬಹುದು. ಹಾಗಾಗಿ, ಬಾಯಿಯ ಸ್ವಚ್ಛತೆಯನ್ನು ಕಾಪಾಡಲು ನಿತ್ಯವೂ ಹಲ್ಲುಜ್ಜುವುದು, ಹಲ್ಲುಗಳ ಸಂಧುಗಳಲ್ಲಿ ತೆಳುವಾದ ದಾರ ಹಾಕಿ ಸ್ವಚ್ಛಗೊಳಿಸುವುದು, ನಾಲಿಗೆಯನ್ನು ಕೆರೆದು ಸ್ವಚ್ಛಗೊಳಿಸುವುದು ಹಾಗೂ ಆಗಾಗ ಉಪ್ಪುನೀರಿನಿಂದ ಗಳಗಳ ಮಾಡುತ್ತಿರುವುದು ಮೊದಲಾದ ಎಲ್ಲಾ ಕ್ರಮಗಳನ್ನು ಕೈಗೊಳ್ಳಬೇಕು.

 

ಚೆನ್ನಾಗಿ ನೀರು ಕುಡಿಯಿರಿ :
ನಿತ್ಯವೂ ಬಾಯಿಯ ಸಹಿತ ದೇಹದ ನೈರ್ಮಲ್ಯವನ್ನೂ ಕಾಪಾಡಬೇಕು. ದಿನವಿಡೀ ಸಾಕಷ್ಟು ನೀರನ್ನು ಕುಡಿಯುತ್ತಿರ ಬೇಕು. ಕಾಫಿ ಹಾಗೂ ಇತರ ಕೆಫೀನ್ ಯುಕ್ತ ಪೇಯಗಳ ಸೇವನೆಯನ್ನು ಮಿತಗೊಳಿಸಬೇಕು. ನಿಮ್ಮ ಆಹಾರದಲ್ಲಿ ಸಾಕಷ್ಟು ನಾರಿನಂಶವಿರುವಂತೆ ನೋಡಿಕೊಳ್ಳಬೇಕು.

 

ರಾತ್ರಿ ಮಲಗುವ ಮುನ್ನ ಹಲ್ಲುಜ್ಜಿ ಮಲಗಿ :
ಉಸಿರಿನ ದುರ್ವಾಸನೆ ನಿವಾರಿಸಲು ನಿಮ್ಮ ವೈದ್ಯರು ಮೌಥ್ ವಾಶ್ ಎಂಬ ದ್ರಾವಣವನ್ನು ಉಪಯೋಗಿಸಲು ಸಲಹೆ ಮಾಡಬಹುದು. ಇದನ್ನು ಸರಿಯಾದ ಕ್ರಮದಲ್ಲಿ ಬಳಸಬೇಕು. ರಾತ್ರಿ ಮಲಗುವ ಮುನ್ನ ಈ ದ್ರಾವಣದಿಂದ ಗಳಗಳ ಮಾಡಿ ಮಲಗಬೇಕು. ಹಲ್ಲುಜ್ಜುವ ಜೊತೆಗೇ ಫ್ಲೂರೈಡ್ ಯುಕ್ತ ಮೌತ್ ರಿನ್ಸ್ ಎಂಬ ದ್ರಾವಣ ಬಳಸಿ ತೊಳೆದುಕೊಳ್ಳುವ ಮೂಲಕ ಹಲ್ಲುಗಳಲ್ಲಿ ಆಹಾರಕಣಗಳು ಇಲ್ಲವಾಗದಂತೆ ನೋಡಿಕೊಳ್ಳಬಹುದು.

 

ಕೆಲವೊಂದು ಆಹಾರಗಳನ್ನು ತಿಂದ ಬಳಿಕ ಬಾಯಿ ಮುಕ್ಕಳಿಸಿ :
ವಿಶೇಷವಾಗಿ ಮೀನು, ಮಾಂಸ, ಹಾಲು ಮತ್ತು ಹಾಲಿನ ಉತ್ಪನ್ನಗಳನ್ನು ಸೇವಿಸಿದ ಬಳಿಕ ತಪ್ಪದೇ ಬಾಯಿಯನ್ನು ತೊಳೆದುಕೊಳ್ಳಿ. ಈ ಆಹಾರಗಳನ್ನು ಜಗಿಯುವಾಗ ಇವು ಹಲ್ಲುಗಳ ಸಂಧುಗಳಲ್ಲಿ ಸಿಲುಕಿಕೊಳ್ಳುವ ಸಾಧ್ಯತೆ ಹೆಚ್ಚು. ಅಲ್ಲದೇ ನಾಲಿಗೆಯ ಮೇಲ್ಭಾಗ, ಒಸಡುಗಳ ಸಂಧುಗಳಲ್ಲಿ ಇವುಗಳ ಕಣಗಳು ಉಳಿದು ಕೊಳೆಯುವ ಸಂಭವ ಹೆಚ್ಚಿರುತ್ತದೆ.

 

ಬಾಯಿ ವಿಪರೀತವಾಗಿ ಒಣಗಿದರೆ :
ಒಂದು ವೇಳೆ ಬಾಯಿ ವಿಪರೀತವಾಗಿ ಒಣಗಿದರೆ (xerostomia),ಇದರಿಂದ ಬಾಯಿಯಲ್ಲಿ ಲಾಲಾರಸದ ಪ್ರಮಾಣ ಕಡಿಮೆಯಾಗುತ್ತದೆ ಹಾಗೂ ದುರ್ವಾಸನೆ ಹೊಮ್ಮುತ್ತದೆ. ಈ ತೊಂದರೆ ಇರುವವರು ಸಕ್ಕರೆ ಇಲ್ಲದ ಜಗಿಯುವ ಗಮ್ ಜಗಿಯುವ ಮೂಲಕ ಲಾಲಾರಸ ಸ್ರವಿಕೆಗೆ ನೆರವಾಗುತ್ತದೆ.

 

ದಂತವೈದ್ಯರನ್ನು ಭೇಟಿಯಾಗಿ :
ನಿಮ್ಮ ದಂತವೈದ್ಯರನ್ನು ನಿಯಮಿತವಾಗಿ ಭೇಟಿಯಾಗಿ ಹಲ್ಲುಗಳ ಆರೋಗ್ಯವನ್ನು ಪರೀಕ್ಷಿಸಿಕೊಳ್ಳಬೇಕು. ಅಗತ್ಯವಿದ್ದರೆ ವೃತ್ತಿಪರ ಸ್ವಚ್ಛತೆಯನ್ನೂ ಮಾಡಿಸಿಕೊಳ್ಳಬೇಕು. ನಿಯಮಿತವಾದ ವೈದ್ಯರ ಭೇಟಿಯಿಂದ ಒಸಡುಗಳಿಗೆ ಎದುರಾಗ ಬಹುದಾಗಿದ್ದ ತೊಂದರೆ ಅಥವಾ ಇತರ ತೊಂದರೆಗಳ ಬಗ್ಗೆ ವೈದ್ಯರಿಗೆ ಮಾಹಿತಿ ದೊರೆತು ಸಾಕಷ್ಟು ಮುನ್ನೆಚ್ಚರಿಕಾ ಕ್ರಮ ಕೈಗೊಳ್ಳಲು ಸಾಧ್ಯವಾಗುತ್ತದೆ.

 

ಧೂಮಪಾನ ಅಥವಾ ತಂಬಾಕು :
ಬಾಯಿಯ ದುರ್ವಾಸನೆಗೆ ಇನ್ನೊಂದು ಕಾರಣ ತಂಬಾಕು ಉತ್ಪನ್ನಗಳು. ಧೂಮಪಾನ ಅಥವಾ ತಂಬಾಕು ಜಗಿಯುವುದು, ಪಾನ್ ಮಸಾಲಾ ಜಗಿಯುವುದು ಮೊದಲಾದವು ಬಾಯಿಯ ದುರ್ವಾಸನೆ ಉಂಟು ಮಾಡುತ್ತವೆ. ತಂಬಾಕು ಹಲ್ಲುಗಳನ್ನು ಸವೆಸುವ ಜೊತೆಗೇ ಒಸಡುಗಳ ತೊಂದರೆಗಳಿಗೆ ಪ್ರಚೋದನೆ ನೀಡುತ್ತದೆ. ಬಾಯಿಯ ತೊಂದರೆಗಳು, ವಿಶೇಷವಾಗಿ ಬಾಯಿಯ ಕ್ಯಾನ್ಸರ್ ಎದುರಾಗಲು ತಂಬಾಕು ಉತ್ಪನ್ನಗಳು ಪ್ರಮುಖ ಕಾರಣವಾಗಿವೆ. ಹಲ್ಲುಗಳ ಸಂಧು ಮತ್ತು ಒಸಡುಗಳು ಸವೆದು ಎದುರಾಗುವ ಕಾಯಿಲೆಗಳಿಗೂ ತಂಬಾಕು ಮೂಲವಾಗಿದೆ. ಹಾಗಾಗಿ ತಂಬಾಕು ವ್ಯಸನದಿಂದ ಹೊರಬರುವ ಪ್ರಾಮಾಣಿಕ ಪ್ರಯತ್ನ ಮಾಡಬೇಕು.

 

ಕೆಲವೊಂದು ಕಾಯಿಲೆಗಳು ಕೂಡ ಕಾರಣವಾಗಿರಬಹುದು:
ಕೆಲವೊಮ್ಮೆ, ಯಾವುದೋ ಅನಾರೋಗ್ಯದ ಕಾರಣದಿಂದಲೂ ಬಾಯಿಯ ದುರ್ವಾಸನೆ ಎದುರಾಗಬಹುದು. ಉದಾಹರಣೆಗೆ ಶ್ವಾಸವ್ಯವಸ್ಥೆಯಲ್ಲಿ ಎದುರಾಗಿರುವ ಸೋಂಕು, (ಮೂಗು, ಗಂಟಲು, ಶ್ವಾಸನಾಳ, ಶ್ವಾಸಕೋಶ), ಉಲ್ಬಣಗೊಂಡಿರುವ ಸೈನುಸೈಟಿಸ್, ಸೋರುವ ಮೂಗು, ಉಲ್ಬಣಗೊಂಡ ಬ್ರಾಂಖೈಟಿಸ್, ಮಧುಮೇಹ, ಕರುಳುಗಳಲ್ಲಿ ಎದುರಾಗಿರುವ ತೊಂದರೆಗಳು, ಯಕೃತ್ ಮತ್ತು ಮೂತ್ರ ಪಿಂಡಗಳ ತೊಂದರೆಗಳು ಇತ್ಯಾದಿಗಳೂ ಬಾಯಿಯ ದುರ್ವಾಸನೆಗೆ ಕಾರಣವಾಗಬಹುದು.

 

ನೀರು ಕುಡಿಯುತ್ತಾ ಇರಬೇಕು:
ಬಾಯಿಯ ದುರ್ವಾಸನೆ ಎದುರಾಗದಂತೆ ತಡೆಯಲು ನಿತ್ಯವೂ ಸಾಕಷ್ಟು ನೀರು ಕುಡಿಯುತ್ತಿರಬೇಕು. ಪ್ರತಿ ಬಾರಿ ಊಟದ ಬಳಿಕ ಹಲ್ಲುಜ್ಜಿಕೊಳ್ಳಲು ಸಾಧ್ಯವಾಗದೇ ಇದ್ದರೆ ಕೇವಲ ನೀರಿನಿಂದ ಮುಕ್ಕಳಿಸಿ ಕೊಳ್ಳಬೇಕು ಮತ್ತು ನೀರು ಕುಡಿಯುತ್ತಿರಬೇಕು. ಇದರಿಂದ ಹಲ್ಲುಗಳ ನಡುವಣ ಕೂಳೆ ನಿವಾರಣೆ ಯಾಗುವ ಮೂಲಕ ಬ್ಯಾಕ್ಟೀರಿಯಾಗಳನ್ನೂ ನಿವಾರಿಸಬಹುದು. ಕೆಲವೊಮ್ಮೆ ಹಾಲು ಕುಡಿಯುವುದರಿಂದಲೂ ದುರ್ವಾಸನೆ ಇಲ್ಲವಾಗಿಸಬಹುದು. ಸಕ್ಕರೆ ಭರಿತ ಪೇಯಗಳನ್ನು ಸೇವಿಸುವುದನ್ನು ಮಿತಗೊಳಿಸಿ.

 

 

ಕಾಫಿ ಸೇವನೆ ಕಡಿಮೆಗೊಳಸಿ:
ಕಾಫಿ ಸೇವನೆಯನ್ನು ಆದಷ್ಟೂ ಮಿತಗೊಳಿಸಿ. ಕಾಫಿ ರುಚಿಕರವಾಗಿದ್ದರೂ ಕಾಫಿಯ ಕಣಗಳು ನಾಲಿಗೆಯ ಹಿಂಭಾಗದಲ್ಲಿ ಹೆಚ್ಚು ಅಂಟಿಕೊಳ್ಳುತ್ತವೆ. ಈ ಭಾಗವನ್ನು ಸ್ವಚ್ಛಗೊಳಿಸುವುದು ಕೊಂಚ ಕಷ್ಟ. ಏಕೆಂದರೆ ಇಲ್ಲಿ ಕೆರೆದರೆ ವಾಂತಿಗೆ ಪ್ರಚೋದನೆಯಾಗುತ್ತದೆ. ಹಾಗಾಗಿ ಕಾಫಿಯ ಬದಲು ಹಸಿರು ಟೀ ಅಥವಾ ಆರೋಗ್ಯಕರ ಮೂಲಿಕೆಗಳ ಟೀ ಕುಡಿಯಿರಿ.

 

ಮದ್ಯಪಾನ ಮಾಡದೇ ಇದ್ದಷ್ಟೂ ಆರೋಗ್ಯಕರ:
ಧೂಮಪಾನ ಅಥವಾ ತಂಬಾಕು ಉತ್ಪನ್ನಗಳನ್ನು ಸೇವಿಸದಿರಿ. ಮದ್ಯಪಾನ ಮಾಡದೇ ಇದ್ದಷ್ಟೂ ಆರೋಗ್ಯಕರ. ವ್ಯಸನಿಯಾಗಿದ್ದರೆ ನಿಮ್ಮ ಸಾಮರ್ಥ್ಯಾನುಸಾರ ತಗ್ಗಿಸಿ. ಮದ್ಯ ನಿಮ್ಮ ಬಾಯಿಯನ್ನು ಒಣಗಿಸುತ್ತದೆ. ವಿಶೇಷವಾಗಿ ಮದ್ಯ ಸೇವನೆಯ ಬಳಿಕ ಮುಂದಿನ ಹತ್ತು ಘಂಟೆಯವರೆಗೂ ಬಾಯಿಯಿಂದ ದುರ್ವಾಸನೆ ಸೂಸುತ್ತಿರುತ್ತದೆ.

LEAVE A REPLY

Please enter your comment!
Please enter your name here